பட்டுப் பாவாடை

தையல்காரன் தைத்திடாத 
பட்டுப் பாவாடை - இது
கையால் வண்ணம் தீட்டிடாத
பட்டுப் பாவாடை 


பச்சை, நீலம், மஞ்சள் போன்ற
பலவித வர்ணத்தால் - இது 
இச்சை கொண்டு இயற்கை செய்த 
பட்டுப் பாவாடை 


கோடுகள் புள்ளிகள் என்றே கோலம் 
காட்டும் பாவாடை - இது 
கோடிப் பொன்னைக் கொடுத்தால் கூடக் 
கிடைக்காப் பாவாடை


பட்டு, மாலா, நீலா, லீலா 
பத்மா அனைவருமே 
தொட்டுத் தொட்டுப் பார்க்கத் துடிக்கும் 
பட்டுப் பாவாடை


பட்டாம்பூச்சி போட்டுக் கொண்ட 
பட்டுப் பாவாடை 
பாரில் இதுபோல் கிடைத்திடுமோ சொல் 
பட்டுப் பாவாடை

அ ஆ பாடம் கற்றிடலாம்

அறிவும் ஆற்றலும்               அ   ஆ  வாம்

இன்பமும் ஈகையும்              இ   ஈ   யாம் 

உண்மையும் ஊக்கமும்           உ   ஊ  வாம்

எளிமையும் ஏற்றமும்             எ   ஏ   யாம்

ஐக்கியமும் ஒழுக்கமும்               ஐ   ஒ  வாம்

ஓங்காரமும் ஒளவையும்          ஓ   ஒள  வாம்

அ  ஆ  பாடம் கற்றிடலாம் - நம்

ஆசான் அவரைப் போற்றிடலாம்

கண்கள்

சின்னஞ் சிறிய குருவிக்கு

கடுகு போன்ற கண்களாம்

வளலயில் பதுங்கும் நண்டுக்கு

குன்றிமணிக் கண்களாம்

குட்டிக் குட்டிப் பூனைக்கு

கோலி குண்டுக் கண்களாம் 

வெள்ளை வெள்ளை முயலுக்குப்

பளிங்கு போன்ற கண்களாம்

அறிவில் சிறந்த ஆந்தைக்கு

முட்டை போன்ற கண்களாம் 

ஆனால் அழகு மயிலுக்கோ

தோகை முழுதும் கண்களாம்

மின்னுது மினுக்குது நட்சத்திரம்

கார்த்திகைத் தீபங்கள் போல வானில்            

மின்னுது மினுக்குது நட்சத்திரம்                     

தங்கைப்  பாப்பா கண்களைப் போல

மின்னுது வானில் நட்சத்திரம்

மின்மினிப் பூச்சிகள் நிலாவைக் காண

வானம் சென்று வழி தவறி

இங்கும் அங்கும் அலைவது போல

இருளில் ஒளி விடும் நட்சத்திரம்

கூடை முல்லைப் பூக்களை எடுத்து

குளிரும் நிலவின் மேல் எவரோ

கொட்டி விட்டது போல வானில்

மின்னுது மினுக்குது நட்சத்திரம்

சிட்டுக்குருவி

                                                        Photo by Vladyslav Dukhin from Pexels

சின்னச் சின்னச் சிட்டுக்குருவி

சின்னப் பையன் கிட்ட வா

தட்டு நிறைய நெல்லைத் தருவேன்

தட்டிடாமல் கிட்ட வா

கடுகு போலக் கண்களாலே

பயந்து பயந்து பார்ப்பதேன்?

வானில் பறந்து செல்கிறாயே

தரையில் தத்திச் செல்வதேன்?

சின்னஞ் சிறிய அலகினாலே

நெல்லைக் கொறித்து அரிசியின்

மணியை மட்டும் பிரித்து எடுக்கப்

படித்ததெந்தப் பள்ளியில்?

சுறுசுறுப்பாய்ப் பறந்து திரியும்

சிட்டுக் குருவி உன்னைப்போல்

துறுதுறுப்பாய் நானும் வாழ்வேன்

உறுதி இது உறுதியே

துப்பறியும் எறும்புகள்

                          Photo by Poranimm Athithawatthee from Pexels

சாரை சாரையாக எறும்பு

ஊர்ந்து ஊர்ந்து செல்லுது

சத்தம் இல்லை சுவரின் மேலே

வரிசையாகச் செல்லுது

சுறுசுறுப்பாய் எறும்புகளும்

போவதெங்கே புரியலே

ஏணி மேலே ஏறிப் பார்த்தேன்

கண்ட காட்சி சொல்லவா?

பண்டிகைக்கு அம்மா செய்த

பலகாரங்கள் யாவையும்

பத்திரமாய் வைத்த பெரிய

பாத்திரம்தான் இருந்தது

உச்சி மீது ஒளித்து வைத்த

இனிப்பை எடுத்து நானுமே

அச்சம் இன்றி ஆவலோடு

ஆசை தீரத் தின்னுவேன்

இனிப்பிருக்கும் இடத்தைக் கண்டு

பிடித்த எறும்பை மறப்பேனோ?

இல்லை இல்லை, அவர்களுடன்

பங்கு போட்டுக் கொள்ளுவேன்